PAGALAGADAN TI 9TH SANIATA LITERARY AWARDS

 

SANIATA LITERARY AWARDS

 

Agawaten ti Saniata Literary Awards (sigud a Saniata Prize) kadagiti entry para iti pasalipna iti daniw ken ababa a sarita (flash fiction). Daytoy ti maika-9 nga edision ti salip (narugian idi 2012) ken is-isponsoran ti Sadiri Publishing (sigud a Saniata Publications) ken ti Pamilia Tabag.

Maipaayan iti pammadayaw a Hall of Fame ti makayalat iti lima nga Umuna a Gunggona kadagiti nagtipon a kategoria.

Dagiti pagalagadan ti salip:

1. Naluktan ti salip idi Disiempre 31, 2022 ket agpatingga iti Hulio 22, 2023. Silulukat kadagiti amin a mannurat nga Ilokano malaksid kadagiti empleado ti Sadiri Publishing ken kadagiti kameng ti Pamilia Tabag.

2. Addaan ti salip iti dua a kategoria: Daniw ken Ababa a Sarita (flash fiction).

3. Iti kategoria a Daniw, buklen ti pakisalip iti lima a daniw. Saan a makedngan ti kaatiddog ti tunggal daniw.

4. Iti kategoria nga Ababa a Sarita, buklen ti lima gasut (500) wenno nakurkurang pay a balikas.

5. Maysa laeng a pakisalip iti tunggal kategoria ti mabalin nga ipatulod ti mannurat.

6. Masapul nga orihinal, di pay naipablaak, ken nakasurat iti lengguahe nga Ilokano wenno saan a naipatarus manipud iti sabali a lengguahe ti isalip a sinurat. No matakuatan a nabalusingsing daytoy a pagannurotan, maibabawi ti gunggona ket maparitanto metten a makisalip ti autor iti ania man a pasalip ti Saniata Literary Awards.

7. Masapul nga iti PDF file amin a pakisalip iti single space, Times New Roman a font ken 12 a rukod.

8. Masapul nga agusar iti nagan iti pluma (pen name) ti mannurat. Iraman ketdi iti email ti kompleto a nagan, numero iti selpon, ken adres ti pagtaengan wenno opisina.

9. Ipatulod babaen ti email ti pakisalip iti sadiri.publishing@gmail.com iti Subject a “9th Saniata Literary Awards: Ababa a Sarita” para iti ababa  a sarita ken “9th Saniata Literary Awards: Daniw” para iti daniw. Kayatna a sawen, no makisalip iti agpada a kategoria, agduma a mensahe iti email ti panangidatag kadagitoy.

10. Dagiti premio para iti tunggal kategoria: 1st Prize: PhP3,000.00; 2nd Prize: PhP 2,500; 3rd Prize: PhP2,000.00; ken adda mainayon a merch manipud iti Tianggi Ilokano ni Derick Marcel F. Yabes iti kada gunggona.

11. Maipakaammo dagiti mangabak inton Agosto 16, 2023 ken mapadayawan met dagitoy iti pasken nga iwayat ti Saniata Literary Awards iti maikeddeng nga aldaw iti Oktubre 2023.

12. Makipagtagikua ti Saniata Literary Awards kadagiti mangabak a daniw ket awan sungsungbatanna kadagiti mannurat no bilang usarenna dagitoy iti ania man a wagas a kas iti pannakaipabuya, pannakaipablaak iti magasin wenno libro, ken pannaipaskil iti social media. Agtalinaed ketdi ti copyright iti autor.